Daagbook van eine nieje prins (Deil 2)
Noe de körsbuim om ós haer weer aan ’t verdwiene zien, waert ’t tied det ich mien twieëde dael ‘ns gaon sjrieve.
Dit sjtökske begin ich natuurlik allerieërs mit alle Drakinne en Drake ’n zalig niejjaor te wènse. Ich haop det geur allemaol net zo’n sjoeën daag as mich höb gehad. En die daag die waere vanaaf noe allein nog mer sjoeëner. Veur zien namelik aangekòmme in 2012, ’t jaor det ich as prins van de Drake veurop moog gaon tiedes de vastelaovend in Beesel. Vanaaf noe kèn ich de waeke gaon tèlle.
Mer d’r mót natuurlik waal nog ’t ein en anger gebeure. In miene kop gebeurt d’r in idder geval al genog. Dök sjrik ich sjnachs wakker en den bön ich opèns al oet, of ich sjtaon al baove op de prinsewage in de optoch.
Jao miense, ’t hèlt mich ech bezig. Ich höb d’r gewuuën kei väöl zin in.
Verder wil ich uch auch nog aeve zegke det miene kersverse adjudant d’r auch same mit mich ‘ne sjoeëne vastelaovend van geit make. Veur höbbe zelfs al de polonaise door ’t hoes gelaupe om zoeë alvàs in de sjtumming te kòmme.
Ich haop det geur d’r net zoväöl zin in höb as veur det höbbe, want den weite veur zeker det ‘t ‘ne hiele sjoeëne tied geit waere.
En vergaet ’t neet; Veur doon ’t same!
Drakeprins 2012
Weit geur waem de nuuie prins zal waere? Bring hiej uch sjtum oet in de poll!
This post has
0 notes and tag:
# prins 2012
.
